Ranjish hi sahi dil hi dukhane ke liye a

a phir se mujhe chhod ke jane ke liye a

Pahle se marasim na sahi phir bhi kabhi to
rasm-o-rahe duniya hi nibhane ke liye a

Kis kis ko batayen ge judai ka sabab hum
tu mujh se khafa hai to zamane ke liye a

Kuchh to mere pindar-e-muhabbat ka bharam rakh
tu bhi to kabhi mujh ko manane ke liye a

Ek umr se hoon lazzat-e-giriya se bhi mahroom
aye rahat-e-jan mujh ko rulane ke liye a



      




Ab tak dil-e-khush faham ko tujh se hain ummeedain
ye akhiri shamain bhi bujhane ke liye a

Mana ki muhabbat ka chupana bhi hai muhabbat
chupake se kisi roz yeh jatane ke liye a

Jaise tujhe ate hain na anye ke bahane
aise hi kisi roz na jane ke liye a