Yeh jaan kar bhi k donon k raaste thay alag
Ajeeb haal tha jab us se ho rahe thay alag

Yeh harf o lafz hain duniya se guftugoo k liye
Kisi se hum sukhani k mukaalame thay alag


 


Khayal un ka bhi aaya kabhi tumhein jaanan
Jo tum se door bahut door jee rahe thay alag

Hami nahin hain, hamari tarah k aur bhi log
Azaab mein thay jo auron se sochte thay alag

Akele pan ki azeeat ka ab gila kaisa
Faraz khud hi to apnon se ho gaye thay alag...


AHMED FARAZ