Mast hawaa ka jhonka aaya, chha gayi teri khushbu;
Paagal ho kar dhoondh raha hoon, kahaan chhupi hai tu?

Sharaarat abhi tak gayi nahin, chhed kar chhup jaana;
Is baar aisi chhupi tu ki bas baaki bacha viraana...

Meethe meethe taane tere, taras raha hai dil;
Kaano mein hain goonj rahe, jeena hai mushkil.

Wo lamhe jo saath the hum, kahaan gaye wo pal?
Ab to murda baaki raha, jaan to kabki gayi nikal.

Yoon sharma kar, katra kar, behka kar dekhna tera,
Hai woh aankhen kahaan gayi, akhir kya kasoor tha mera?

Mehendi waale haath tere, khushbu waale baal;
Kisne thaame honge unko, jaan lega yeh sawaal...

Rumzum si payal paon mein, khanakte kangan haathon mein;
Jhilmil si hasi yoon honton pe, mahekta gajra baalon mein...


 


Ab to baaki rah gaye, baraste saawan aankhon mein;
Saansein to aaj bhi lete hain, wo jaan nahi hai saanson mein...