Tum na aaye the to har ik cheez wohi thi ki jo hai
Aasmaan hadd-e-nazar, raahguzar- raahguzar, sheesha-e-mai- sheesha-e-mai
Aur ab sheesha-e-mai, raahguzar, rang-e-falak
Rang hai dil ka mere, “khoon-e-jigar hone tak”
Champaai rang kabhi, raahat-e-deedaar ka rang
Surmayi rang ki hai sa’at-e-bezaar ka rang
Zard patton ka, khas-o-khaar ka rang
Surkh phoolon ka, dehekte hue gulzaar ka rang
Zehar ka rang, lahu rang, shab-e-taar ka rang
Aasmaan, raahguzar, sheesha-e-mai
Koi bheegaa hua daaman, koi dukhti hui rag
Koi har lehzaa badaltaa hua aaina hai
Ab jo aaye ho to thehro ki koi rang, koi rut, koi shai
Ek jagah par thehre
Phir ik baar har ik cheez wohi ho ki jo hai
Aasmaan hadd-e-nazar, raahguzar-raahguzar, sheesha-e-mai- sheesha-e-mai