Mujh se pehli si Mohabbat...
A masterpiece by the great poet
Faiz Ahmed Faiz


Mujhse pehli si mohabbat mere mehboob na maang


 


Maine samhja tha ke tu hai tou darakhshaan hai hayaat

Tera gham hai tou gham-e-dehar ka jhagraa kya hai?

Teri soorat se hai aalam mein bahaaron ko sabaat

Teri aankhon ke siwa duniya mein rakha kya hai?

Tu jo mil jaaye tou taqdeer nigoon ho jaaye

Yun na tha main, na faqat chaaha tha yun ho jaaye

Aur bhi dukh hain zamaane mein mohabbat ke siwa

Rahatein aur bhi hain wasl ki raahat ke siwaa!

Anginat sadiyon ke taareek bahimaana talism

Resham-o-atlas-o-kamkhwaab mein bunwaaye hue

J
aa-ba-jaa bikte hue kucha-o-bazaar mein jism

Khaak mein luthre hue khoon mein nehlaaye hue

Jism nikle hue amraaz ke tunnooron se

Peep behti hui galte hue nasooron se

Laut jati hai idhar ko bhi nazar kya keeyje

Ab bhi dilkash hai tera husn magar kya keejye?

Aur bhi dukh hain zamaane mein mohabbat ke siwa

Raahatein aur bhi hain wasl ki raahat ke siwa!!!

Mujhse pehli si mohabbat mere mehboob na maang!