اس سے پہلے کہ بے وفا ہو جائیں
کیوں نہ اے دوست ہم جدا ہو جائیں


تو بھی ہیرے سے بن گیا تھا پتھر
ہم بھی کل جانے کیا سے کیا ہو جائیں


تو کہ یکتا تھا بے شمار ہوا
ہم بھی ٹوٹیں تو جا بجا ہو جائیں


ہم بھی مجبوریوں کا عذر کریں
پھر کہیں اور مبتلا ہو جائیں


 



ہم اگر منزلیں نہ بن پائے
منزلوں تک کا راستہ ہو جائیں


دیر سے سوچ میں ہیں پروانے
راکھ ہو جائیں یا ہوا ہو جائیں


اب کے گر تو ملے تو ہم تجھ سے
ایسے لپٹیں تری قبا ہو جائیں


بندگی ہم نے چھوڑ دی ہے فراز
کیا کریں لوگ جب خدا ہو جائیں


احمد فراز






Name:  Ahmed Faraz (3).jpg
Views: 268
Size:  99.9 KB