log pahunchay to faqat lafz-o-bayaaN tak pahunchay
kaas koii to mere dard-e-nihaaN tak pahunchay

dil hai seenay may na auroN ka kaleja tera
tere ehsaas ko duniya ye kahaaN tak pahunchay

saahib-e-dil koii milta nahi duniya may kahiiN
ik isee gham say to ham aah-o-fughaaN tak pahunchay

dhoondtay dhoondtay ik jins-e-wafa ko aakhir
... ham jahaaN say hi alag ek jahaaN tak pahunchay

aalam-e-mehr-o-murawwat ki thi ham ko jo talaash
thakk gaye jab to phir apnay hi makaan tak pahunchay

jo tasavvur may mohabbat ka jahaaN hai apnay
kaash! duniya bhi kabhi aise jahaaN tak pahunchay

raah bhi hai yahi, manzil bhi yahi hai unko
ishq may jo tere qadmoN k nishaaN tak pahunchay

na jhukay jo kabhi haalaat ke taabay ho kar
sar unhii ke to yahaaN nok-e-sinaaN tak pahunchay

mae-kaday may to sabhi rindd hain aatay jaatay
saahib-e-zarf magar peer-o-mughaaN tak pahunchay

shukr kyuN-kar ho adaa teri khabar-geerii ka
be-amaaN bhi to yahaaN teri amaaN tak pahunchay

raaz-e-hasti to koii samjha hai na samjhega 'Anees'
kuch jo pahunchay to faqat wehm-o-gumaaN tak pahunchay...

~Meer Anees.......