Eik Lafz-E-Mohabbat Ka Adnaa Sa Fasana Hai,
Simte To Dil-E-Aashiq..Phaile To Zamana Hai..

Ye Kis Ka Tasawwur Hai Ye Kis Ka Fasana Hai,
Jo Ashk Hai Aankhon Main..Tasbeeh Ka Daana Hai..
...
Ham Ishq Ke Maaron Ka Itna Hi Fasana Hai,
Rone Ko Nahin Koi..Hasne Ko Zamana Hai..


 


Wo Aur Wafa-Dushman Manege Na Maana Hai,
Sab Dil Ki Shararat Hai..Aankhon Ka Bahana Hai..

Kya Husn Ne Samjha Hai Kya Ishq Ne Jaana Hai,
Ham Khaak-Nashinon Ki..Thokar Main Zamana Hai..

Wo Husn-O-Jamaal Un Ke Ishq-O-Shabaab Apna,
Jeene Ki Tamanna Hai..Marne Ka Zamana Hai..

Ya Wo The Khafa Ham Se Ya Ham The Khafa Un Se,
Kal Un Ka Zamana Tha..Aaj Apna Zamana Hai..

Ashkon Ke Tabassum Main Aahon Ke Tarannum Main,
Maasoom Mohabbat Ka..Maasoom Fasana Hai..

Aankhon Main Nami Si Hai Chup-Chup Se Wo Baithe Hain,
Naazuk Si Nigaahon Main..Naazuk Sa Fasana Hai..

Hai Ishq-E-Junoon-Peshaa Haan Ishq-E-Junoon-Pesha,
Aaj Ek Sitamgar Ko..Hans Hans Ke Rulana Hai..

Ye Ishq Nahin Aasaan Itna To Samajh Lijeye,
Ek Aag Ka Dariya Hai..Aur Doob Ke Jana Hai..

Aansu To Bahut Se Hain Ankhon Main ‘Jigar’ Lekin,
Bindh Jaaye So Moti Hai..Rah Jaaye So Daana Hai..