Mujhe Aaram Karne Do, Mujhe Ab Mat Sataao Tum
Thakan Sadiyon Ki Hai Mujh Ko, Mujhe Ab Mat Jagaao Tum

Meri Khamosh Aankhon Se, Koi Qissa Na Kehna Tum
Mere Khaabon Mein Sehra Hain, Mujhe Ab Mat Rulaao Tum

Dukhon Ki Ik Kahani Thi, Ussi Ka Aakhri Hissa
Bohat Arse Se Jaari Tha, Usse Ab Mat Dohraao Tum


 


Mere Viraan Kamre Mein, Teri Tasveer Ab Bhi Hai
Ye Ab Kamre Ka Hissa Hai, Isse Ab Mat Hataao Tum

Mere Jaane Ki Baaton Per, Kabhi Woh Hansta Rehta Tha
Mere Jaane Ki Raaton Mein, Usse Ab Mat Hansaao Tum

Tumhaari Diary Ke Aakhri Auraaq Mein Main Thi
Safhey Yun To Na Phaaro Tum, Mujhe Yun Na Mitaao Tum

Kahin Sehra, Kahin Saahil, Kabhi Mitti, Kabhi Paani
Mujhe Jo Cheezen Bakhsi Theen, Un Hi Se Ghar Banaao Tum

Waheen Par Hoon, Main Waisa Hoon, Ab Aaey Ho To Ruk Jaana
Thakan Ki Dastaan Apni, Mujhe Ab Mat Sunaao Tum

Bohat Mushkil Se Sambhla Hai, Ik Arsey Baad Ye Dil
Lo Ab Ye Jaam Ulta Do, Isse Ab Mat Pilaao Tum...