Parinde or insaan
parindon or insaanon main kitni qurbatain hain
aur kitni aadaton main aik jaise hain
bahaar aaye to kitne chehchahate hain
khizaan ho to kitni khamoshi se kaat lete hain
kabhi toofaan main ghir jaayen
to ser gerdan main de k beth jaate hain
duaain maangte hain k toofan ab to tall jaaye
ye ik din to nikal jaaye
kabhi sooraj nikalne per
kabhi sooraj nikalte hi
kabhi sooraj se pehle hi
talash e aab o daana main nikal perte hain apne aashiyanon se
kisi din laut aate hain
kisi din doob jaate hain
parindon or insaanon main qurbat ki gawahi pairr dete hain
k donon ko ghana saaya derakhton se hi milta hai
kabhi jheelon se in donon ki gehri piyaas ki poocho
jahan paani bhi milta hai
aur apna aap bhi moujon main lehraata hua ye dekh sakte hain-
mager ik moar aisa hai
jahan insan parindon se buhat hi mukhtalif maloom hota hai
parinde bal k insaan se buhat hushiyaar lagte hain
k insaan doosray insaanon ko dhoka dete hain
kabhi ik doosray k phaansne ko jaal bunte hain
mager ab tak kisi ne ye nahin dekha
kabhi koi parinda jaal phaila ker
kisi dooje parinde ko paker ker qaid main daalay
kisi ki jaan se khele
kisi se zindagi cheene .....